Sigbjørn Skåden
Mu Muhammad Ali
Mu Muhammad Ali
Muhammad Ali
guhte ságastii,
ságastii,
ságastii,
Muhammad Ali
guhte oinnii iežas boksefáhcaid boahtteáiggi,
guhte riibmestii Moore in four
ja ovtta skoddui skábmamánoeahkeda njealját jorrosis
návlii Archie Moore Los Angelesa eatnamii,
dego livččii
oidnojuvvon
dego livččii
áidna bestejupmi,
dego livččii
áidna.
Muhammad Ali
guhte dánsestii,
dánsestii,
dánsestii,
Muhammad Ali
gean áŋkera ii oktage oaidnán
go 218 pounda máfiavuohta gahčai eatnamii
dego elektroluvvan cizáš,
gean oappát ja vieljat gáhtain ja juŋgelis sus gáibide
Ali, buma ye!
Ali, buma ye!
ja
Muhammad Ali
fuolahii:
Kinshasas mollii jiehtanasa,
Manillas roaiskkuhii gorilla,
Muhammad Ali
lei nu garas ahte dálkasa skibahii,
lei máilmmi coolamus
viellja bárdni áhčči irgi
njálbmi ruohtasteame,
juolggit šleađggádeame,
you out, sucker!
O bohtet dál niegut
boađe beaivváš,
bohtet heađit stuorrát ja ovdohagat gobdat,
dá lean,
dá mu oaidnit,
dá lea visot,
dá leat
mon ja mu
vilges várit,
mon ja mu ođasvuiton
opmodat,
mon ja mu
mu (siepmanluvvan seaŋga?)
mu (jorri jurdagat?)
mu (hápmárasti heahpan?)
. Muhto ulbmilii:
Muhammad Ali
don it leat boksár,
don leat jurdda,
profehta gibžume korssa nala,
lean 15 jagi
ja beare nuorra vásihit
Muhammad Ali
muhto jáhkán muitalusaid muitaluvvon,
čáppa, litna
Muhammad Ali
mu
Muhammad Ali
mu
Muhammad Ali
mu
Muhammad Ali