Zoran Anchevski (Зоран Анчевски)
ЕВРОПА
ЕВРОПА
(Ламент со фолклорен призвук)
Ах
ти прелепа божице
што богот наш суров
без поштеда и пардон
те опаша грубо
сега освета слатка ни спремаш
судбината
ко џамаданче ни ја кроиш
и ни редиш приспивни бајки
но не во сон сладок
ами во очај и летаргија нè фрлаш
Ах
Зевсе ненаситен
никаквецу од небесна сорта
манијаку сексуален
што несреќа на врат ни врза
што грев в мозок ни жигоса
та ни камшик ни пост велик
оттаму не може да го истера
Ах
милост имај божице сјајна
еве на колена клечиме
пред портите
на домот твој златен
петиците ти ги целиваме
услиши ја нашава молба
прошка дај ни за гревот наш древен
и прибери нè внатре бар малку
тело запустено да одмориме
и да згрееме душа грешна
подај ни сал трошка
од трпезата ти божеска
и вечно името твое
ќе го славиме
и пелтечиме