David Chikhladze  (დავით ჩიხლაძემ)

Translator

ტუჩები ბოთლის ყელს სინჯავენ
ეწაფებიან ზღვაში გადაგდებული ბოთლების წერილებს
ნაჯღაბნი ბუნდოვანი ადგილების ბუტბუტით
ხორხისმიერ-კულულებიანი ბუყბუყით ბუშტუკების

თავაზიანობის ფორმულებში დაჭმუჭნილი საწყისების
ყურადღებით გამოთქმა

ველური სიცილით გაგუდვა
კატასტროფის დეტალებში წვდომა

გემი ჩაიძირა
და მზე შეიჭმუხნა
და ზღვა გადმოკიდული გადმოიღვარა
და ჩვენ აქ ვართ
ჩვენ აქ ვართ
აქ

ჩვენ, თქვენი სუროგატული ძმები და დები
აზროვნებით, ცხადია, აბა სხვა რით
გინდ ნასესხები, გინდ არამიწიერი
ნუთუ არსებობს რაიმე განსხვავება ამნეზიის ამ სტადიაზე
მათთვის ვინც არამიწიერი ნეტარება იგემა

ჩვენ სწორედ ისინი ვართ, ჟელესებრი ზეციური მოსახლენი
დაკარგულნი რკინა-ბეტონის უკაცრიელ ჯუნგლებში
ვდგავართ წარწყმედილნი როგორც ჯერ კიდევ აღმოუჩენელი
ცრუორანგუტანგები
დაუმუშავებელ სანაპიროზე საშურველი შამპანზეესი
ვუცდით სიგნალს და ვიხრჩობით წყურვილით

აქ გაიშალა მელანი
და ვარდისფერ და ცისფერ ლინზებში მედუზების
გამოკრთნენ ბრტყელი არამეტყველი სახეების
                  გადარეცხილი ნაკვალევები

არ გეგონოს, რომ ეს კაცი უსახლკაროა
მან უბრალოდ გასაღები დაკარგა
და უკვე მეოთხე თვეა ავეჯის მაღაზიის
კიბის საფეხურებზე ათევს ღამეს

ალბათ მისთვის არც ისე მოსახერხებელი უნდა იყოს
ასეთ მოკაკვულ პოზაში ყოფნა
თუმცა ის ხომ აკრობატია
და ასე უფრო უადვილდება თვლემა

საიდან მოიტანე, რომ მოკვდა
დიდი ამბავი, თუ არ სუნთქავს
სხვას რას უნდა ელოდო ასეთი გამოცდილი იოგებისგან
მათ ხომ მრავალი წლის მანძილზე შეუძლიათ სუნთქვის შეჩერება

უფრო ზუსტად კი, თითქმის სამუდამოდ

ვერ ვცნობდი მას
და რომ მენახა
ის იყო თუ არა მართლა
ახლოს მივედი

სხვა ჩანთა, ვარცხნილობა
თვალები სხვა ფერისაა
და მაინც ის იყო

და მე ავირიე
სულ აღარ ვიცოდი რა მექნა

მაგრამ დავძლიე მორცხვობა
მივუახლოვდი
ხელი ჩავკიდე, მოვეფერე

ცრემლსადენი გაზის ბოთლი
ამოაძვრინა, და შემაშხეფა სახეში

ვიხრჩობი გაზის მტკივნეულ ცრემლებში
დაბრმავებული, მოსლუკუნე, ვიკლაკნები
და მოულოდნელად მასში შევედი

და საპირისპირო მხრიდან გამოვედი

შემოვბრუნდი -
არა, მაინც არ იყო ის

ვის მივაქირავო ბინა, რომ მდგმური
საიმედო აღმოჩნდეს და არ გაანადგუროს ყველაფერი
და რომ დროულადაც გადაიხადოს
მიუხედავად იმისა, რომ, დიახ, ონკანები ოდნავ ჟონავს
და ფილები გამუდმებით ცვივა პირდაპირ აბაზანაში
საერთოდ ბინა დიდი არ არის, თუმცა კი
ცენტრშია, და ბევრი არასაჭირო ავეჯიცაა და ტარაკნები
მაგრამ მთავარი ის არის, როდესაც გააქირავებ,
                 თვითონ სად იცხოვრო?

როდესაც ძალზე მგრძნობიარე კანისგან დამზადებულ სკაფანდრში
სრული უწონადობის მდგომარეობაში
უძრავად წევხარ დივანზე
და შენი სუნთქვისგან შიგნით ყველაფერი იორთქლება
ხუჭავ თვალებს და გესმის როგორ მღერიან
მდინარის გადაღმა, ხეობის გაღმა, ტყის მიღმა
როგორც დივანის დაჟანგული ზამბარები
და მოელოდები მხოლოდ ერთს: რომ მოკლე
ღრმა ჩასუნთქვით ფილტვებში შემოვიდეს
თითქმის დავიწყებული სიმძიმის ძალა

რაღაცნაირად გულუბრყვილო იქნებოდა დამშვიდობება წინასწარ
მარადისობაში, რომელსაც მცირე შესვენებები ახლავს თან
ყალბ მარმარილოს ნამდვილი ბზარები გასჩენია
და იშვიათად თუ ვინმეს სთხოვონ ამ არასახუმარო
                  ხარვეზებზე საუბარი
მაგრამ სივრცე დაეჭვებისთვის ამ ფარგლებშიც მოიძებნება

ნუთუ ღირს ეხლა, შემდეგ ან კიდევ მერე
საეჭვოდ თეთრ ყრუ კედელთან სველი ხის პოზით
ინსტიქტურად გაახმოვანო გამჟღავნების
                  პროცესში მყოფი
პოლაროიდის რამდენიმე ჭერიდან თვითნაკეთი დაბურცული
სარკეებიდან ჩამოცურებული მზერა რომელმაც თავი
ვერ შეიმაგრა მარმარილოს არათანაბარ შუქში

როგორ გადმომეცი, შთამინერგე ეს ნიშნული
მოქცევის დროს ზღვა გაყინული
თოვლი, ზედ წაყრილი ქვიშით, მარილით
მკვდარივით იწვა - თავს იკატუნებდა
ყველაფერი იცვლებოდა, უჩვეულოდ იცვლებოდა

ფანჯრებს მიღმა შუქი ჩააქრეს, ლიფტი დაიძრა
ჩვენ ოთხნი ნელა ქვემოთ და შიგნით
ალბათ ცხელა სუსტად ანთია ტაბლო
გადასაყვანი შხეფივით გადღაბნილა ლაქა
გვერდით და პარალელურად ნაგავსაშვები მილი მისდევს

ეს იყო ამ ანდა წინა კვირა დღეს

არ მსურდა ურთიერთობების ხანგრძლივი გარკვევა
მაგრამ შენ მოითხოვდი
მეათე ტრამვაის გაჩერებაზე
სადაც ბოტანიკური ბაღის კედელია

რა გაეწყობა, გავარკვიოთ

დასაწყისისთვის შენთვის მაინც უკეთესია წამოწვე
რათა ადვილად შეძლო ჩემი გაგება

და მოდი ასე: გულახდილობა გულახდილობის წილ
აი, ნახე, მეც გაურკვეველ მდგომარეობაში ვარ
და ჩემგან კიდევ ბევრ რამეს შეიძლება ელოდო

მაინც ხომ უკვე ძნელი გასაგებია, ვინ ვინ ჩაითრია
და ვინ კიდევ თვითონ იქნა ჩათრეული საკუთარი ნებით

დაუდევრობა იყო ჩემზე ასე მინდობა
თუმცა გასაგებია, რომ მე - საფლავი ვარ
მაგრამ წარმოიდგინე, როგორია ამის საკუთარ თავში შენახვა
თუნდაც ასეთი გარსშემოდენილი ფორმით

კარგი გვეყოფა ამის შესახებ
მე ორი ლატი მაქვს - რა შეგვიძლია გავაკეთოთ

კიდევ რაღაც ჭიანჭველების ცოცვას იგრძნობ
ეს არაა თმის ბოლოები შეჭრის შემდეგ
კისერში რომ გროვდება ცივი ზღარბ-ვარცხნილობის ძირში 
დავიწყოთ - დუმს - მასაჟი
ყელს გაციებული კაწრავს ზღარბი
გააცხელეთ გეთაყვა - დუმს — მაგრამ სულაც არ არის საშიში
და იყურება შუბლშეჭმუხნილი
კმაყოფილებისგან ამგვარად გაკვირდებიან თვალებით
მხოლოდღა ლითონი შენი ტუჩების გემოთი
მხოლოდღა ქვა

ბრინჯაოსსახიანი ქანდაკება
მონა ქალი სპილოს ძვლის კბილებით
აუქციონამდე ორი დღით ადრე
აღმოჩნდა ავად

მოიკაკვა
ძალზე სტეხს სახსრები
წკმუტუნებენ ბზარები ზედმეტად წვრილ მაჯებში
ტკივილისგან სისხლდენამდე იკბინა მარჯნის ტუჩზე

შიშით პარალიზებული იყურება
დაძაბულობისგან გაუშეშდა, გაუბუჟდა კისერი
წაერთვა და უნებისყოფოდ ჩამოუვარდა ხელი
მუჭში მოქცეული ჩანაწერი დაუვარდა

გამოცდილი რესტავრატორი
აეტმასნა და ცდილობდა ჩაესვა
გადაადგილებული მარმარილოს ხერხემალი
უჩურჩულებს “ნუ გეშინიათ, ცოტათი გაიტკაცუნებს“
გრილდებიან მკერდში ადუღებული ცრემლები

ამუშავებენ იმ ადგილს
სადაც გაიფანტა და გაშრა შხეფი
თითების გათეთრებულ ძვლებზე
თავისი ულვაშებისგან იკეთებს ჯაგრისს
წმენდს მონამტვრევებს, ნაკერებს, იღლიებს, უბეს და დაღს

შემდეგ ქალი მხოლოდ შეკრთება
ჩაქუჩის კაკუნზე
და განდგება უნებურად
როდესაც ახალი პატრონი გააწკაპუნებს ენას