Ruth Lillegraven
draumen
draumen
så ei natt
eg ligg der og
drøymer og døser
då kjem far min
gode far min
til meg
endre, seier han
eg skulle hatt att
skøytet på garden
men du far, seier eg
du treng vel ikkje det
der du er
nei, seier han, men eg
tenkjer slik på ho signe
syster di
du kjem deg jo ikkje
opp att
du er som far min
du klarar det ikkje
no lyt du
sleppe taket
så ikkje garden
går ned med deg
dette seier han
så blir han borte
så vaknar eg og
får ikkje sove
tenkjer og
tenkjer
neste dag tilbyr eg
signe og nils garden
etter litt tid
kjøper dei han
mot avtalt sum
og lovnad om kår
så får me bli her
abelone og eg
men eg veit at
eg ikkje lenger
er som far
så kven er
eg no