Mangesh Narayanrao Kale (मंगेश नारायणराव काळे)
अट
अट
त्यानं आपली सावली
खांद्यावर घेतली
नि तो चालू लागला
मग त्याच्या साावलीनं
त्याला खांद्यावर घेतलं
नि तीही चालू लागली
दोघांमध्ये बोलत राहण्याची अटय
जो बोलणार नाहीये
त्याच्या मस्तकाची हजार शकलं होणारयेत
यात तो निघून जाऊ शकतो
सावली खाद्यांवर घेऊन दूर
तरीही चालणं थांबणार नाहीये
झाड चालू लागेल
सावली खांद्यावर घेऊन
किंवा झाडाची सावली
झाडाला घेईल खांद्यावर
दोघांमध्ये चालत राहण्याची अटय
जो चालणार नाहीये
त्याच्या मस्तकाची हजार शकलं होणारयेत
झाड थांबेल एकवेळ
सावली वाऱ्यावर सोडून
तरीही क्रम बदलणार नाहीये
वारा पळत राहील सावली खांद्यावर घेऊन
किंवा झाडाची सावली घेईल वारा खाद्यांवर
नि पळत राहणारेयेत निरंतर एकमेकांच्या सोबतीनं
दोघांमध्ये पळत राहण्याची अटय
जो पळणार नाहीये
त्याच्या मस्तकाची हजार शकलं होणारयेत
थांबेल वारा काही वेळ थकून
झाडही असेल अगोदरच थांबलेलं
तो एकटाच जात राहील पुढेपुढे
तरीही प्रवास थांबणार नाहीये
दोघांमध्ये पुढे जाण्याची अटय
जो पुढे जाणार नाहीये
त्याच्या मस्तकाची हजार शकलं होणारयेत
त्यानं आपली सावली
खांद्यावर घेतली
नि तो चालू लागला ...