Mangesh Narayanrao Kale (मंगेश नारायणराव काळे)
उलट्याच छापून यायला लागल्याहेत ओळी
उलट्याच छापून यायला लागल्याहेत ओळी
म्हणजे नेमकं काय होतंय
याचा अदमास येत नाहीये अजून
उलटंच छापलं जातंय हे नक्की
म्हणजे गेली चाळीस वर्षं
गुमान सुरू होतं मशिन
अधनं मधनं पट्टा बिट्टा तुटला
फार्फार तर
नि एखाद्दोन पार्ट झाला बद्दिमाग
त काढून टाकला आपण इमानइतबारीनं
टाईम टू टाइम ऑईल पाणी चेक करायची
तशी सवयच नव्हती लावली कधी तरीही
बेटं गुमान पळायचं पण छापायचं निमूट
मधली काही वर्षं
आवाज व्हायचा थोडा जास्तीचा
तर त्याची सवयच झाली होती कानाला
मध्येच शाई कमी धरायची प्लेट
नि कधी स्कमही यायचा डोळा चुकवून
तरी छापायचं बिनबोभाट आपलं मशिन
नि हे आताच काय झालं मास्तर
की उलटंच उमटायला लागलं सगळं
थेट प्लेट उलटी लावून पाह्यली कितीदा
तरीही उलटंच यायला लागलं छापून
नि सरळ ठेवली तरीही तेच उलटं
सर्व्हिसिंग ऑयलिंग काय काय असंल ते
पाह्यलं करून पण येतच नाहीये अदमास
मशिन पळतं फास्ट स्पीडही तग धरूनये
कागदही राहतात शाबूत इतक्या वेगात
पण अक्षरं उलटीच उमटू लागली आहेत
ठेवलं बंद काही दिवस मशीन
पोटाला चिमटा मारून केली
चाल ढकल अक्षरांशिवाय
अगदी छापखाना बंद करणं
हा एकमेव आक्सीर इलाजही
फोल ठरलाय मास्तर
नि हा मशीनचा धडाड् तर
वाजतच राहतो दिनरात कानात
नि अक्षरं उमटंतच राहतात उल्टी
चष्म्याच्या काचाआड दर्वळणारी
घरं बदलली गावं बदलली माण्सं बदलली
या उलट्या अक्षरांपायी कितीदा कितीदा
तरी सुकूँन कुठाय मास्तर?
नि आज त हाईटच झाली मास्तर
सकाळचं वर्तमानपत्र उघडलं तर तेही उलटंच छापलेलं