Sigbjørn Skåden
Backstage, Sámi Grand Prix
Backstage, Sámi Grand Prix
Enter min sáŋgár. Geahččit gullojit.
MIN SÁŊGÁR
O Jipmil, ráhkis, nanusmahte váimmun,
Ja lodne munnje odne amas fámuid,
Go oainnán áiggiid áiggi lahkoneame,
Ja gorudis dál gullo oahpes geassu:
Mu máttarmáttuid čáhppes vára gohčču.
Ja váre golgá mus nai unna biehkáš
Min dološ fámuin, ovddeš mihávuođas,
O ráhkis čáhppes máttut, dollet gitta
Mus, dollet gieđaid, dollet jiena vuoimmi
Go dili elektrisitehta gaiku
Mus,illá nagan mon dál jaskat čohkkát.
GEAHČČIT
O eambbo!
MIN SÁŊGÁR
Ohmygod, mus duoldá várra!
O shit, dál in šat muitte čállon sániid!
Maid dahká olmmoš? Vuoiŋŋa, unna lunttaš,
Dál luoitte áimmu sisa, ale vuovsse,
Ja muitte dál de lea duáigi boahtán,
Hal muitte diimmuid aktonassan lanjas,
Hal muitte boares Casioa jienaid,
Go odne galgá oaidnit olmmošsohka
Mu ollisvuođa máilmmi stuorra lávddis.
Dál eaišat galgga nuorravuođa vilppat
Mus oidnot, eaige galgga ovddeš suttut
Mu dálá eallinbálgá sevnnjodahttit.
Mon gullot galggan olles čieža gielddas,
Ja čieža šáikasis mon galggan gullot!
Dál guldalehket neavrrit, ulddat, visot,
Ja Jipmilat vel lodne munnje bealji,
Go šuokŋan muitala mu ođasvuiton
Go rávisvuođa go lo lo go lo la!
GEAHČČIT
Wow dette!
MIN SÁŊGÁR
Jipmil, please,jusdál de vuovssán,
O ale divtte gáktái goaikut liema,
Go muittát, rihpaid válden girkolanjas,
Ja mannan juovllaid ledjen vel du luhtte,
Ja Ánne-ristamuoŧá hávdádeamis.
Jus odne eahkedis buoragit manná,
De lohpidan dus fitnat duollet dálle,
De vaikko boađán olbmojápmingehtte
Ja ristagieđaiguin boran du čeavssaid.
Huff, dál de dobddan cohki laggagoahtá,
De gulul,cohkán, ale viega dál vel,
Ja gieđat, heitet darrat, dál lea áigi!
Dál rahppu govččas, oainnán čuovggaid do!
Enter Sámi Grand Prix Konferansiera
KONFERANSIERA
Na, boađʼal!
MIN SÁŊGÁR
Konferansiera go?
I know thy errand, I will go with thee.
The day, my friends, and all things stay for me. Exeunt