Inger-Mari Aikio
Máilmmis dása (excerpt)
Máilmmis dása (excerpt)
ájačáhci
honnet ja
silkeguobbara lákca
ráhkesvuođa juhkamuš
bajándálki
vuojada mu siste
ravddas ravdii
miehtá almmiávgadasa
jietna joavdá easkka
golmma mánu geažes
geassemánnu
ii dohkken
ii idja
ii iđit
ii beaivi
ii eahket
iige suoidnemánu idja
iige iđitidja
iige árraiđit
vurddii beaivváža suotnjariid
jo bures ligget
ovdal go de
viimmat
buorre iđit
spábbačiekči
guhkki
lei mátki
áhččát
sálte munno
gatnjaliiguin
guovttevahkkosažžan
álge eahketčierrát
beannot lihttera
ovccis gaskaidjii
sus gatnjalat
munnos bivastagat
beakkán čeahpes musihkkár
guokte konseartta beaivvis
golbma diimmu hávil
guldaleaddjin dušše
eadni ja áhčči
beaivi beaivvi
idja ija maŋŋá
snuđđu
čierru
bárgu
báárgu
bááááárguuuuu
holvu
hoooooolvuuuuuuuuuuuuuuuuu
gillju
giiiiiiiiiiiiiiiiiiiiillllllllllllllljuuuuuuuuuuuuuuuuuuuuuuuuuuu
gottášingo su
vai iežan?
oh go sáhtášinge
máhcahit su
dohko gos bođiige
bidjat fárrui báberstuhka
masa čálestan “vihki”
dahje “boasttu gálvu”
das son čohkká
beaŋkka alde
mieiggada
ruškes čalmmat
uhca albmáš
áidna bargun
stuorrut
ja das mun čohkkán
beavdeguoras
mieiggadan
alit čalmmat
váiban eadni
áidna bargun
stuorrut suinna
ja nu dáhpáhuvaige
ahte sturron
ja son stuorui
ja mii stuoruimet
guovtte jagis
guovtte guhkes jagis
ráhkis
ráhkis uhca albmáš
ja ráhkis
ráhkis stuorra almmái
mii!
MII!