Ussjedh amma,
ibie dan bïjre soptsesth —

dïhte doen vearremes mojhtese – 
ib sïjhth manneb tjïelkesth,
ib sïjhth tjïelkesth,
nov hævvi, ib sïjhth —

mohte iktesth årrodh goh månnoeh limen.

Gosse skuvlesne vihth eelkib dov namhtah,
ööhpehtæjja mij gïeleb manneste veedti munnjien jeehti

ahte

                                                                      mijjen gïelh lea sosijaale faamoeh
                                                                               mejtie rïektes almetjh utnieh.

                                                                     Gïele mijjeb jeatjalaakan sjugnedi,
                                                                                                                              jah
                                          eah juvrh vaallah maadtoe maehtieh soptsestidh.

Mohte jïenge dutnjien gujhth soptsesti doen
iehkeden.

Novh maa,
dellie idtjib riktih satneb guarkah,
jah sov ammes baakoeh mov bïeljine böölin,
mohte sutnjien læjhkan jeehkib hov.

Daaroesti munnjien.

                                                                                                     Aellieh eelesovvh,
                                                  reerenasse dov gierkie-njoktjemeb daarpesje

Föörhkedib.

Skuvlesne gierkie-vïedtjh
mov vaajmoen bïjre tseegkib.

Jah die manneb daaroedahteme.
Baakoeh manneste rinti.

Dompes ålmine sjidtib

Jah

novh sån
mov rïektes gïelen namhtegh
manne gujhth unnebe sjïdtib.

Vaakumisnie datneb saangerdeb.



Fehkehteb
manne bïevesteminie

Manne

jah

gajhkesh mah leab,
datneb voejngehteb.

Dov åelkieh jïengen vööste,
monnen njoektjemh sjaavoejægan –
tjaetsie lea galmes
dov båadtsoes rudtjen tsiegkie

Muvhtene funhterdeb
jïs veasome sjïere-laakan sjidteme

jïs manne
                                                           ih datne

lib jïengen nuelesne årrome.

                                                                                                                        Goltelh
                                                                                                         manne jeahtab.

Vallah nïekedeb.

Ib riktih daejrieh.

Datne leah mov uvte,
dov tjeehpes voepth goh skopmehkine
dov bïjre,
jah lopmetjelmieh mov åejvesne dabtab.

Månnoeh sïjhtien bååstede,
mohte daajrab gujhth

ib maehtieh daan histovrijeb jeatjahtehtedh.

                                            Ib utnieh buerie åssjalommes dogkoe vaedtsedh.

                                                                                                                      Tjuatsa.

                                                                 Månnoeh maehtien daesnie baetsedh

Dellie idtjib manne soptsesth,
mohte nïekedassesne
mov njaelmie lea soenine doepeme

jah

jïenge mov tjelmide gaptja.

Dle giesie daesnie,
mohte baajhkoe lij dov luvnie.
Ij biejvie mueltien nuelesne goekh

Mov bangsemh galmes deavab gaajesjieh.
Aarebi dah guaktah ligan rööpses muerjieh byöpmedamme,



                                                                                                                         mohte

tjåejjie ennje gåaroes,
jah ib doesth vielie vaedtsedh.

Gojhkelovveb.

Gïeleme
sakteb.

Gåessie dan bïjre ussjedeb,
maahtab datneb
ajve Luvlie Geavhtan gaedtesne mujhtedh.

Soejine dov åelkies gïetesne
jah viermine dov boelvesne

aerpie-maahtoe mij boelveste bualvan vaadtsa

jah
mov luvnie orriji.

Dov gïeth

goh

biejvielåblojne jaevrien raastah.

Ikth manneb lïerih
gusnie meehtib tjoevtjh daesnie gaavnedh,
mohte ib manne ennje daejrieh

gusnie maahtab datneb vihth gaavnedidh.

Daelvie

Månnoeh edtjimen maadtose
Lopmedoenehkinie

Sæjjan vaeriej jah jaevriej gaskoeh

Slïehtie monneb slïedtjedahteme.

Stoerremes jaevrien bealesne nåeledigan.

Bïegke datneb geahpode.
vallah aejkie irhkie,

Sjaavohth lea gosse vihth gaamedien.
Laake monnen maanabealeste.

                                                                                                      Aellieh soptsesth
                                                                      goeksegh maehtieh dijjeb govledh

                                                                                                                              jah

                                                                                                     dijjeb laarhkodh

Jïs soptsestien
Jïs tjarkadien gujhth veasodh.

Læjhkan manne leab soptsesteminie.

                                                                                      Ib sïjhth veerine jaemedh

Mov gïele lååvesje
goh ræjrojne
goh ledtiedåehkine

Mohte ib maehtieh annje dab gïeledh.

Jah galmes daelvie-jaevresne veerine
datne leah batneminie.

Fïerhten biejvien mov nahkarinie.

Mov lea veelkes gierkieb
mov gårroeh gïetesne
mij mov plaave åerine batnenieh,

mohte væjrosne ib mij gænnah
maehtieh dab viehkiehtidh.

Datne jïengine joejkh,
manneb

jallh

jïjtjemdh joejkh

gïe riktih daajra?
 
                                                                                              jïjjege gïelh ektiedieh
                                                                                                       månnoeh aktine.

Die vihth jaavran vaadtsah
dov sealadimmien gåajkoe.

Jaame-aajmoe on Repeat

Jïenge stryödje

jah

ean riktih skeejnh mij leah sjïdteminie
mohte goeksegi nuelesne
smalhtjarien.

Gåessie bååstede væjrose båatab
vihth pryöveb datneb tjöödtjestidh.

                                                                   Ib sïjhth vaerie-jaevresne sealadidh
                                                                                   maehtien daesnie baetsedh

Åemehke munnjien vuartesje,
gïelehtadtje,

sov tjeehpes tjelmieh buelieh.

                                                                   Aellieh straavh, månnoeh jåerhkien

Bïegke monneb njeala.



dellie maajetjh gïjre munnjien bööti,
biejvieb mannesne lööveldih;
nåejsie-maadtoe åara.

moerh edtjieh bahtsedidh
mov biejjelisnie
gåessie fahkab



Jah ib manne daejrieh gænnah
giejnie soptsestib
gåessie manneb gaarvenih,

mohte dov nomme ennje vaajmosne guadtab
sjïeline

vearelden stööremes staaloej vööste.