luovus
raban vearráha
rišahan geahppa ilu
návddašan addálas eallimis
lean ollásit du
dalle go lean duinna
muhto dušše dalle
lean maid su
ja su ja su ja su ja su
ja de lean fas du
ollásit ja oppalaččat
aiddo dalle go lean
das ja dalle ráhkistan
lean jorri bearal
inge divtte ovttage šat
čugget árppu iežan čađa
njukčaáiggit leat meattá
girddašan ja skavvehalan
vilddáskan guolbbavirožin
lean ollásit du
dalle go lean duinna
dušše fal dalle
© Inger-Mari Aikio
Aus: 69 čuoldda – 69 pylvästä
Guovdageaidnu, Norway: DAT, 2018
Audioproduktion: Haus für Poesie, 2019
Aus: 69 čuoldda – 69 pylvästä
Guovdageaidnu, Norway: DAT, 2018
Audioproduktion: Haus für Poesie, 2019