ఇహలోకంలో దుఃఖం అంటే ఏమిటో ఇంకా అవగాహన లేకపోయినా
ప్రపంచపు ఉదాసీన శీతలత్వాన్ని అప్పుడే పసిగడుతూ
కన్నుపొడుచుకున్నా కానరాని రాత్రుళ్ళకి భయపడుతూ
కల్తీలేని కన్నీళ్ళతో ఏడుస్తుంటారు పసిపిల్లలు

ఇహ సరే కాటికి కాళ్ళు చాచుకున్న పెద్దవాళ్ళు
అస లెందుకు పెరిగి పెద్దవాళ్ళయ్యారో కూడా అర్థంకాక
ఆఘమేఘాలమీద పారిపోతున్న కాలం నించి ఒక నిమిషం లాక్కుని
కారుస్తారు బరువైన చిక్కటి చీకటి కన్నీళ్ళు

అందరూ ఏడుస్తారు, పద్ధతులు ఎంత వేరువేరైనా
కొందరి ఏడుపు చిల్లరకి పనికొచ్చే నాణెం
మరికొందరి కన్నీళ్ళు బంగారం
వాటిని వాళ్ళు ప్రత్యేకమైన గల్లాపెట్టెలో దాచుకుంటారు

మనుషులకేసి చూసి దేవతలు కూడా కన్నీళ్ళు పెట్టుకుంటుంటారు
వాళ్ళ కన్నీళ్ళు క్రిస్మస్ సాయంకాలం మంచుపింజలు
మామూలు రోజుల్లో వాళ్ళ కన్నీళ్ళ కర్తవ్యం
భూమ్మీద సముద్రమట్టాన్ని హెచ్చుతగ్గులు లేకుండా కాపాడడం