ЦИПА

за тебе е значаен внатрешниот свет: 
зачетокот, отровот, обликот 

безлична навидум
се менуваш без престан 
ти мазна, ти гипка, ти пожелна 
ни бегаш од раце 
додека ја толкуваме неизбежноста 
и отвораме оган против самите себеси 
а ти, и натаму проѕирна по природа, 
ни го свртуваш вниманието 
и го поставуваш основното прашање 
	но нас, но нас нè интересираат 
	деталите 

кога те допревме 
лиги ни потекоа 
да не можеме да скриеме дека сме луѓе 
и дека ја сакаме совршеноста 
и во тебе, и надвор.